Prej disa ditësh, Shqipëria po përjeton të nxehtin afrikan, ndërsa pritet që moti të marrë kthesë nesër, ku parashikohen shira me intensitet të ulët në pjesën më të madhe të vendit. Shirat do të përfshijnë kryesisht zonën qendrore dhe veri-lindore të Shqipërisë, kurse jugu do të jetë me diell edhe pse me temperatura më të ulëta.
Gjatë ditës së sotme ndërkohë moti i keq ka shkaktuar probleme të mëdha në Ferizaj dhe Kaçanik të Kosovës duke përmbytur rrugët, ndërkohë që era e fortë ka shkaktuar dëmtime në biznese.
Ndërkohë, aktualisht vetëm disa kilometra larg brigjeve tona është duke u zhvilluar një stuhi detare me shi, erë të fortë dhe rrufe të cilat reflektohen edhe në të dhënat satelitore të agjencive të motit në Europë. Përballë Durrësit duket të jetë formuar një “perde e zjarrtë”, spektakël rrufesh që zgjat prej disa orësh. Duket se shirat në Kosovë dhe ajo që po ndodh në Adriatik kanë ndikuar në uljen disi të temperaturave gjatë orëve të mbrëmjes në vendin tonë.