Policia ka bërë të mundur arrestimin e një të shpalluri në kërkim për vrasje me dashje mbetur në tentativë dhe armëmbajtje pa leje.
Bëhet fjalë për 30-vjeçarin Arian Armani alias Eljfat Saljiu, banues në Shkodër.
Policia në aksin rrugor Fushë Krujë-Vorë, i ka bërë shenjë ndalimi automjetit të dyshuar me drejtues 27-vjeçarin me inicialet E. L., dhe pasagjer Arian Armani alias Eljfat Saljiu, por drejtuesi i tij nuk i është bindur urdhrave të punonjësve të Policisë dhe ka vijuar lëvizjen në drejtim të Vorës.
Gjatë ndjekjes, nga automjeti ka zbritur Arian Armani alias Eljfat Saljiu, ndërsa drejtuesi i automjetit së bashku me automjetin janë larguar dhe është shpallur në kërkim për përkrahje të autorit të krimit e moskallëzim krimi.
Ndërkohë që Arian Armani alias Eljfat Saljiu, ka tentuar të largohet dhe të fshihet në ambientet e një hoteli në Vorë, por është kapur. Gjatë kontrollit në ambientin e hotelit u gjet një armë zjarri pistoletë me municion luftarak.
Materialet i kaluan Prokurorisë pranë Gjykatës së Tiranës, për veprime të mëtejshme procedurale.