Një ngjarje e rëndë ka ndodhur sot në 19 shtator në Tiranë, ku burri vrau me thikë bashkëshorten e tij.
Autori i vrasjes, H.P ka dhënë edhe versionin e tij, se përse e kreu krimin, raporton gazetari i Klan News Besar Bajraktaraj.
Ai ka thënë se ka pasur konflikte herë pas here me gruan, për faktin se përse ajo qëndronte tek shtëpia e vajzës dhe jo tek shtëpia e tyre. Rrëfeu edhe rrethanat në të cilat ndodhi krimi makabër.
“Kam pasur konflikte herë pas here me gruan. Shkak ka qenë fakti se ajo nuk qëndronte tek shtëpia jonë në Don Bosko, por tek shtëpia e vajzës. I kam kërkuar disa herë gruas të qëndronte tek shtëpia jonë, por nuk pranonte.
Paraditen e sotme e kam marrë në telefon dhe më ka thënë se është në një qendër tregtare. Shkova tek shtëpia e vajzës dhe e gjeta aty. Ajo më kishte gënjyer. Në debat e sipër e qëllova me thikë në zemër”, ishte deklarata e autorit të vrasjes para uniformave blu.
Ngjarja tronditëse ndodhi gjatë ditës së sotme, në një kompleks pallatesh pranë Zogut të Zi. Lumturi Palushi 58 vjeçe u vra mizorisht nga bashkëshorti, në sy të familjarëve.