Pas Federatës Shqiptare të Futbollit dhe Partizanit, ishte radha e klubit të Flamurtarit të reagojë zyrtarisht në lidhje me ngjarjen e rëndë në ndeshjen e së shtunës, ku disa tifozë të skuadrës së kuqe dhunuan fotografin e ekipit kundërshtar.
Pasi dënon ngjarjen e rëndë, deklarata e klubit vlonjat i përgjigjet edhe akuzave të Partizanit, pasi në reagimin e këtij të fundit, Shkëlqim Ramaj u cilësua si “personi me aparat në dorë” dhe se emri i tij nuk ishte në protokollin e ndeshjes. Në dokumentet e publikuara në llogaritë zyrtare të Flamurtarit, Ramaj rezulton të jetë një zyrtar i klubit në dy sezonet e fundit si zëdhënës për mediat dhe fotograf.
REAGIMI I PLOTE I FLAMURTARIT
Flamurtari Football Club ka qëndruar në heshtje deri tani, duke pritur dhe shpresuar që të jenë organet përkatëse në Federatën Shqiptare të Futbollit ato që vendosin, në bazë të rregulloreve, për ngjarjen e shëmtuar të së shtunës në “Selman Stërmasi”, ku u sulmua një zyrtar i klubit dhe një futbollist. Përgëzojmë klubin Partizani për distancimin nga dhuna, por nuk mund të mos reagojmë kur shohim që ngjarja e rëndë kalohet në plan të dytë dhe vendoset theksi, qëllimisht, tek zyrtari i Flamurtarit, i cili u sulmua nga një grup tifozësh. Së pari, “personi me aparat fotografik” është zyrtar i klubit Flamurtari, ka qenë gjithnjë në dy sezonet e fundit, është i regjistruar në Federatën Shqiptare të Futbollit dhe ka funksionin e zëdhënësit dhe të fotografit, që çdo klub i ka në fushë, në bazë të rregullores dhe me aprovimin e zyrtarëve të ndeshjes. Për këtë arsye, nëse klubi Partizani është i paqartë për rolin e zyrtarit të sulmuar gjatë ndeshjes, bën mirë të interesohet dhe të marrë informacion zyrtar në FSHF, para se të bëjë reagime publike që tentojnë të largojnë vëmendjen nga thelbi i ngjarjes. Së dyti, “personi me aparat fotografik” nuk ka luajtur asnjë rol aktiv duke provokuar tifozët. Nëse drejtuesit e Partizanit nuk e kanë këtë informacion, mund të shohin gjithë ndeshjet e fundit të Flamurtarit dhe fotot e postuara në faqen zyrtare të klubit, për të kuptuar që pas çdo goli futbollistët kanë zgjedhur atë mënyrë festimi dhe kërkojnë ata që të fotografohen ashtu, në njërin cep të fushës. Futbollistët nuk ishin drejtuar nga tifozeria e Partizanit, në atë kënd nuk kishte tifozë dhe nuk e kuptojmë ku qëndron provokimi, kur një grup tifozësh vrapojnë, ofendojnë dhe futen në fushë, vetëm e vetëm sepse një grup futbollistësh festojnë në mënyrën e tyre modeste një gol të shënuar.