Meksika ka siguruar kualifikimin në fazën e 1/8-ave të Botërorit 2026, pasi mposhti me rezultatin 2-0 Ekuadorin në sfidën e vlefshme për 1/16-at e finales. Për “El Tri” kjo është fitorja e parë në një ndeshje me eliminim direkt në Kupën e Botës që nga viti 1986.
Takimi në “Estadio Azteca” nisi me një orë vonesë për shkak të kushteve atmosferike, por vendasit nuk e humbën ritmin. Të mbështetur nga tifozët e tyre, meksikanët dominuan që në minutat e para, duke rrezikuar disa herë me Raúl Jiménez dhe Gilberto Mora.
Epërsia erdhi në minutën e 22-të, kur Julián Quiñones realizoi pas një aksioni individual nga krahu i majtë, duke mposhtur portierin Hernán Galíndez me një goditje të fortë në shtyllën e parë. Sulmuesi regjistroi kështu golin e tretë në këtë Botëror.
Meksika dyfishoi shifrat në minutën e 32-të. Raúl Jiménez rikuperoi topin në zonën kundërshtare, kombinoi me Quiñones dhe e finalizoi me qetësi aksionin për rezultatin 2-0.
Në pjesën e dytë, Ekuadori u përpoq të reagonte përmes zëvendësimeve, por nuk arriti të vinte në vështirësi mbrojtjen meksikane. Nga ana tjetër, Meksika administroi avantazhin dhe iu afrua edhe golit të tretë, me César Montes që rrezikoi me një goditje me kokë.
Situata u komplikua edhe më shumë për Ekuadorin në minutat e fundit, kur Piero Hincapié u ndëshkua me karton të kuq pas një incidenti me një kundërshtar.
Me këtë sukses, Meksika regjistron ndeshjen e katërt radhazi pa pësuar gol në Botërorin 2026 dhe vijon rrugëtimin në fazën e 1/8-ave, ku do të përballet me fituesin e çiftit Angli – RD Kongo.
Rezultati:
Meksikë 2-0 Ekuador
Shënuesit:
- Julián Quiñones 22′
- Raúl Jiménez 32′
Karton i kuq:
- Piero Hincapié (Ekuador)