Administrata publike dhe taksat neto mbi produktet kanë sjellë rritjen më të madhe të ekonomisë për tremujorin e tretë të këtij viti me 3.75%. Sipas INSTAT, sektorët e tjerë që kanë mbështetur rritjen janë pasuritë e paluajtshme, tregtia, akomodimi dhe ndërtimi. Ndërsa bujqësia dhe industria vijojnë të jenë në terren negativ.
Produkti i Brendshëm Bruto (PBB), në tremujorin e tretë të vitit 2025, vlerësohet me rritje 3.75%, në krahasim me tremujorin e tretë të vitit 2024.
Ndonëse ekonomia ka përshpejtuar lehtë ritmet e rritjes, të dhënat e INSTAT tregojnë se, ashtu si në 2024-n, përmirësimi ka ardhur nga efekti i administratës publike dhe nga taksat neto mbi produktet.
E matur sipas sektorëve, ekonomia reale është rritur vetëm me 1.31%, ndërsa kontributi tjetër ka ardhur nga “Administrata Publike, Arsimi dhe Shëndetësia” me 1.68%, dhe “Taksat Neto mbi produktet” kontribuan pozitivisht me 0.76%. Ndërkohë, industria dhe bujqësia vijojnë të jenë në vlera negative.
Sipas njoftimit të INSTAT, aktivitetet kryesore të ekonomisë për periudhën Korrik-Shtator 2025, krahasuar me tremujorin e tretë të vitit 2024, janë: “Administrata Publike, Arsimi dhe Shëndetësia” me rritje mbi 15.4%, i ndjekur nga aktiviteti “Pasuri të Paluajtshme” me një rritje prej 10.55%, “Informacioni dhe Komunikacioni” me rritje mbi 10%, ndërsa aktiviteti “Ndërtimi” shënoi një rritje prej 4.75%. Grupi i aktiviteteve të tjera ka pësuar rritje më të ulët. Grupi i aktiviteteve “Industri, Energji dhe Ujë” shënoi rënie prej 4,75% dhe “Bujqësi, Pyje dhe Peshkim” u ul me 1,73%.
Rritja ekonomike e vendit, në vend që të mbështetet te prodhimi, industria, ndërtimi apo tregtia dhe shërbimet, është mbajtur kryesisht nga efekti fiskal i taksave neto dhe shpenzimet publike për pagat e administratës, duke theksuar një model të rritjes së nxitur nga konsumi dhe politika buxhetore, jo nga baza reale prodhuese e bizneseve vendase.
AKTIVITETEVE KRYESORE TË EKONOMISË
Administrata Publike, Arsimi dhe Shëndetësia – 15.04%
Pasuri të Paluajtshme – 10.55%
Informacioni dhe Komunikacioni – 10.40%
Ndërtimi – 4.75%
Tregti, Transport, Akomodim dhe Shërbim Ushqimor – 2.62%
Taksat Neto mbi produktet – 5.39%
Industri, Energji dhe Ujë – -4.75%
Bujqësi, Pyje dhe Peshkim – -1.73%