Dy automjetet e djegura në Elbasan i përkasin ish-gjyqtarit të shkarkuar nga Komisioni i Pavarur i Kualifikimit, Arben Vrioni.
Burime për tirananews.al bëjnë me dije se KPK evidentoi një sërë problemesh në pasurinë e gjyqtarit, përfshirë transaksione që u cilësuan të dyshimta dhe mungesë burimesh financiare për disa vite në shumë totale prej 9.3 milionë lekësh. Nga relatimi u kuptua se Vrioni kishte probleme me një kontratë për blerjen e një apartamenti në fillim të viteve 2000, mungesë burimesh të ligjshme për një apartament të dytë, një transaksion “të dyshimtë” me baxhanakun për të paguar shkollën e vajzës në Britaninë e Madhe dhe një sërë problemesh të tjera. Në mbrojtjen e tij, Vrioni përmendi prejardhjen nga një familje e njohur shqiptare dhe tha se kishte trashëguar prona që i kishin mundësuar pasurinë, ndërsa theksoi se paraardhësit e tij kishin firmosur deklaratën e pavarësisë. Ai vuri në dukje se nëna e tij kishte trashëguar pasuri dhe kishte marrë të ardhura nga kjo pasuri që i ishin dhuruar atij. Ai u bë emocional ndërsa foli për financimin e arsimit të vajzës në SHBA, ndërsa përmendi disa herë rezultatet e saj të shkëlqyera në shkollë.
Problemet
Vrioni kishte probleme me një kontratë për blerjen e një apartamenti në fillim të viteve 2000, mungesë burimesh të ligjshme për një apartament të dytë, një transaksion “të dyshimtë” me baxhanakun për të paguar shkollën e vajzës dhe një sërë problemesh të tjera të pasurisë. Qirko, gjatë relatimit dhe më pas në pyetje e përgjigje vuri në dukje se për blerjen e një apartamenti në vitin 2004 në Elbasan ishin një sërë kontratash që nuk përputheshin me njëra-tjetrën. Sipas relatores, blerja ishte nisur nga nëna e Vrionit në vitin 2002 e cila kishte paguar një kapar 1.5 milionë lekë, ndërsa banesa ishte vlerësuar në kontratë 4.5 milionë lekë. Kontrata ishte mbyllur dy vjet më vonë nga vetë Vrioni, i cili kishte blerë shtëpinë për 1.9 milionë lekë. Qirko tha më tej në seancën dëgjimore se nuk kishte asnjë shenjë në kontrata se çfarë kishte ndodhur me kaparin dhe e quajti atë të djegur, pasi nuk ishin përmbushur kushtet e kontratës. Po ashtu ajo pyeti Vrionin se çfarë kishte ndodhur dhe pse ishte ulur çmimi i shtëpisë nga 4.5 milion në 1.9 milionë. Vrioni i cili kishte shpjeguar se kjo pasuri ishte blerë me të ardhurat që nëna e tij kishte marrë nga shitja e një prone në Gjirokastër, pretendoi se kapari nuk ishte humbur, por ai nuk dha shpjegim mbi diferencën në çmim dhe as për mungesën e dokumentimit të asaj që kishte ndodhur me kaparin.