Përkundër kërkesave të vazhdueshme për rritjen e transparencës së parlamentit ndaj publikut, duket se një problem i tillë është konstatuar edhe nga vetë kryeparlamentari Gramoz Ruçi. Ky i fudnit u ka tërhequr veshin kryetarëve të komisioneve të përhershme parlamentare por edhe punonjësve të tij duke i kërcënuar madje edhe me largim nga puna, raporton tirananews.al.
Në procesverbalin e siguruar nga tirananews.al, Gramoz Ruçi ka deklaruar hapur pakënaqësinë me krerët e komisioneve dhe me punonjësit e tij duke pranuar se vetëm 40 për qind e punës është publike. “Meqë këtu janë të gjithë kryetarët e komisioneve, por edhe shërbimi, për sa i përket transparencës, është e patolerueshme që 40% e aktivitetit të komisioneve parlamentare nuk janë bërë publike. Kjo është vërejtje për shërbimet, por edhe për ju si drejtues komisionesh. (Ndërhyrje pa mikrofon) Është reale, nuk është problemi se është atje. Kësaj pyetjeje ne duhet t’i japim përgjigje. Prandaj, sekretarët, këshilltarët e komisioneve, kush e ka këtë përgjegjësi, do të shkojnë deri në largim nga puna nëse nuk përmbushin detyrën. Kryetarët e komisioneve të thërrasin menjëherë stafin e komisioneve, sepse nuk ka asnjë arsye të përligjur që të mos bëhen publike procesverbalet e mbledhjeve së komisioneve. Qartë!?”, shkruan Gramoz Ruçi. / tirananews.al
