Departamenti Amerikan i Shtetit, ka nisur procedurat për zëvëndësimin e Yuri Kim si ambasadore e SHBA-së në Shqipëri. Ministrja e Jashtme e Shqipërisë përmes një statusi në Twitter konfirmon nisjen e procedurave të zëvendësimit të ambasadores amerikane.
”Në përgjigje të interesimeve të medias gjatë gjithë ditës dhe për të shmangur çdo spekullim mbi “heshtjen” e MEPJ, konfirmojmë se procedura e zëvendësimit të ambasadores Kim ka nisur zyrtarisht, ndërkohë që për emrin e ambasadorit të ri procedura nuk na mundëson të bëjmë komente”,-thuhet në njoftim.
Burime për ”TiranaNews”, bëjnë me dije se ambasadorja Yuri Kim ka kërkuar të vijojë mandatin duke e zgjatur edhe me 7 muaj të tjerë, kjo për të mbuluar zgjedhjet lokale të 14 majit 2023. Por mesa duket ka një ftohje mes ambasadores Kim dhe Departamentit Amerikan të Shtetit. Ky i fundit nuk ka pranuar zgjatjen dhe ka nisur procedurat e zëvendësimit të saj. /TiranaNews/