Në një nga bankomatet e bankave të nivelit të dytë në Urën Vajgurore shpërtheu një sasi eksplozivi. Nga raportimet paraprake mësohet se nga shpërthimi ka vetëm dëme materiale, ndërkohë që policia ende nuk ka dalë me një komunikatë zyrtare për ngjarjen. Dyshohet të jenë grabitur paratë që ndodheshin në bankomat, por për të vërtetuar këtë pritet që të bëhet inventari nga punonjësit e bankës.
Ngjarja ndodhi gjatë natës në qendër të qytetit, ndërsa po vijojnë hetimet për të mësuar detaje të mëtejshme, mbi autorët apo motivet e tyre, ndërkohë që po kryhet ekspertiza dhe po merren gjurmët e gishtave. Hetuesit po kontrollojnë edhe regjistrimet nga kamerat e sigurisë.