Gazetari Artan Hoxha ka komentuar atentatin kundër Emiljano Ramazanit në Elbasan. Në një postim në mediat sociale, Hoxha shkruan se më në fund pasi morën disa goditje të forta rresht, nga “djemtë e Dubait”, ka ardhur reagimi.
Ai shton se ekzekutimi ka ardhur nga lufta për kontrollin e territorit dhe tregut të kokainës. Më tej ai ironizon dhe Policinë e Reformën në Drejtësi, duke u shprehur se në botën e krimit nuk ka vetting fals me lista partie.
“Si ka qenë ajo loja, që luanim kur ishim të vegjël?! Agoj, lojë filloj, 5 minuta sa të fshihem… “Lëviz, lëviz, ky qerrata qytet. Erë xhepane bie, kudo që të shkosh”- thanë pleqtë e Ibrahim Kovaçit, te “I teti në bronz”… Më në fund, pasi morën disa goditje të forta rresht, nga “djemtë e Dubait”, mbase “ata” të “Tarzanit”, u bënë të gjallë… Lufta për kontroll të territorit dhe tregun e “të bardhës”, po korr me sukses viktimat e veta
Ekspertët e policisë vazhdojnë të mbledhin gëzhojat në vendin e ngjarjes. Ndërsa shërbimi zjarrëfikës mbetet në gatishmëri të plotë për të shuar zjarrin e makinës së autorëve të atentatit… “Reforma për drejtësi”, në botën e krimit, është në vijim e sipër. Aty nuk ka vetting fals me lista partie!!! Aty ka AK-47, pa të drejte apelimi… Kampionati vazhdon…”, shkruan Hoxha.