Erdenis Gurishta ka bërë padyshim sezonin më të mirë të karrierës së tij si futbollist. Mbrojtësi e njëkohësisht kapiteni i kuqebluve, ka qenë shpesh vendimtar me lojën e tij në të dy anët e fushës dhe për të, që nuk e braktisi ekipin as në Kategorinë e Parë, trofeu i sotëm kishte më shumë kuptim, siç tregoi ai në “SuperSport” pas sfidës.
“Nuk kam fjalë të përshkruaj këtë moment, jam shumë i emocionuar. Kur gjyqtari dha 4 minuta shtesë, më filluan lot. Isha i lumtur, i emocionuar. Kam vuajtur shumë te ekipi i zemrës, kemi rënë nga kategoria e nuk jam larguar se e dija që Vllaznia dë të vijë. Ja ku erdhi. Kam realizuar shumë ëndrra në një vit, të jem kapiteni i ekipit të zemrës e të fitoj trofe. Shpresoj të jetë vetëm fillimi.
Sa kam besuar? E kam besuar që pas 6 javëve të para, kam kuptuar forcën e ekipit se u ndeshëm me gjithë ekipet e forta dhe dominuam. Patëm një moment të keq psikologjik ku në 8 ndeshje nuk fituam, e aty e humbëm titullin. Në mendjen time e kemi fituar se kemi qenë ekipi më i bukur, por si përfundim e çuam një trofe në Shkodër. Ky trofe shkon për tifozët e Shkodrës, na kanë mbështetur gjatë gjithë kohës, edhe kur kemi rënë. Kjo kupë është për nënën time që ndërroi jetë dy vite më parë e është pengu më i madh i imi që nuk më pa duke ngritur këtë trofe.
Titulli? Të them të vërtetën e dija që kishim pak shanse. Nuk dua të hap polemika e të them se nuk ishte ndeshje e luajtur në fushë ajo e Teutës, por kur i kam parë në kronikë… Gjithsesi, javën e fundit pak shanse kishim. Ne luajtëm për tifozët, treguam që ishim Vllaznia e ekipi më i bukur. Kampionati shkoi te Teuta dhe i uroj suksese, do të shihemi në Superkupë e besoj se do ia marrin. Kam shumë besim edhe që do të kalojmë turin e parë në Europë.
Nuk është anormale që Vllaznia të fitojë një Kupë, meriton më shumë se kaq. Është jonormale që rri shumë vite jashtë Europe e pa trofe. Ky është vetëm fillimi”, ishte premtimi i kapitenit të shkodranëve.