Pesë policë janë pezulluar në Shkodër për shpërdorim detyre. Ky vendim është marrë pasi në vitin 2021, këta efektivë fshehën faktin se kishin gjetur bimë narkotike të kultivuara në fshatrat Curak dhe Shkozë të Pukës. Pas një kontrolli pak ditë më pas, në këto zona u gjetën 4000 bimë kanabis.
Pezullimi i këtyre punonjësve nga detyra është bërë në zbatim të vendimit të Gjykatës së Shkallës së Parë të Juridiksionit të Përgjithshëm Shkodër, e cila ka caktuar masën e sigurisë “Pezullimi i ushtrimit të një detyre apo shërbimi publik”, për veprën penale “Shpërdorimi i detyrës”.
Punonjësit e pezulluar:
– Edmond Pepkolaj, ish-shef i Seksionit për Hetimin e Krimeve, në Komisariatin e Policisë Pukë
– Alfred Ndoj, inspektor
– Zamir Mehaj, me detyrë ndihmësspecialist për informacionin policor dhe arkivën kriminale
– Petrit Florini, me detyrë oficerë të Patrullës së Përgjithshme Pukë
– Fatmir Alia, me detyrë oficerë të Patrullës së Përgjithshme Pukë
Më herët, ministri i Brendshëm, Taulant Balla njoftoi procedimin e tetë policëve, pesë prej të cilëve në Shkodër.
“Vijon intensivisht goditja e grupeve kriminale, por edhe procesi i vetë-pastrimit të Policisë së Shtetit. Vetëm në 48 orët e fundit janë 8 punonjës policie të proceduar penalisht, për “mbyllje sysh” apo më keq akoma bashkëpunim me keqbërësit. Forcimi i bashkëpunimit mes Policisë së Shtetit, Prokurorisë, SPAK, Shërbimit Informativ dhe lufta e përbashkët për spastrimin e vatrave të krimit përballë dhe brenda vetë organizatës së Policisë së Shtetit, do ta çojë Shqipërinë në një tjetër nivel të sundimit të ligjit.”, shkroi Balla.