Dhjetëra emigrantë janë mbledhur pranë kufirit Meksikë-SHBA gjatë ditëve të fundit.
Ata kanë ngritur një kamp pranë brigjeve të Rio Grande dhe po tentojnë të hyjnë drejt shteteve të Bashkuara. Por sipas tyre, Garda Kombëtare e Teksasit nuk po i lejon ata që të dorëzohen pranë agjentëve të patrullave kufitare.
“Ne presim të na jepet shansi, por nuk po na lënë të kalojmë, jemi të dëshpëruar për fëmijët, po u bien të fikët nga uria”, tha një prej emigrantëve.
Emigrantët janë nga shtete të ndryshme të Amerikës Qendrore dhe asaj Jugore. Kufiri tokësor Meksikë-SHBA është cilësuar një nga më të rrezikshmit për emigrantët në vitin 2022, me gati 700 të vdekur dhe të zhdukur, sipas agjencisë së OKB-së për migracionin.