Mëngjesi i kësaj të hëne nis me ndryshime të qeverisë. Ministrja e Infrastrukturës dhe Energjisë, Belinda Balluku është emëruar zv.kryeministre dhe Arben Ahmetaj ikën nga ky post, dhe lajmin e dha vetë kryeministri Edi Rama përmes një postimi në Twitter.
Po ashtu Rama ka informuar edhe se Majlinda Dhuka, bëhet kryenegociatore e Shqipërisë me Bashkimin Europiandhe Ministre Shteti pranë Kryeministrit, duke zëvëndësuar kështu ambasadorin Zef Mazin. Ndryshimi vjen pak ditë pas nisjes zyrtarisht të negociatave. Këto ndryshime do të jenë edhe të parat që do të kenë firmën e Presidentit të ri të vendit, të Bajram Begajt.
“Falënderoj Arben Ahmetajn për kontributin në misionin tonë të përmbushur me një sukses spektakolar për Rindërtimin. Falenderoj Zef Mazin për kontributin në arritjen e madhe historike të çeljes së negociatave; dy bashkëpunëtorë të vlefshëm në një rrugë sfidash që vazhdon”,-shkruan Rama.
Postimi i plotë
Tani që prioriteti i Rindërtimit ia le vendin prioritetit të Negociatave me BE, ndërron profili i ministrit të Shtetit. Majlinda Dhuka, një profil i lartë teknik në vend të profilit të lartë diplomatik të ambasadorit Mazi, bëhet Kryenegociatore& Ministre Shteti pranë kryeministrit.
Energjia si sfida më kolosale e kësaj periudhe dhe infrastruktura si sfidë e pandërprerë kombëtare, janë bërë sot edhe marrëdhënie intensive me qeveri e institucione ndërkombëtare. Koha që roli i zv/kryeministrit të fokusohet në këto fusha. Belinda Balluku bëhet zv/kryeministre.
Falënderoj Arben Ahmetajn për kontributin në misionin tonë të përmbushur me një sukses spektakolar për Rindërtimin. Falenderoj Zef Mazin për kontributin në arritjen e madhe historike të çeljes së negociatave; dy bashkëpunëtorë të vlefshëm në një rrugë sfidash që vazhdon.