Arsyeja e shtyrjes së datës së filmit të Ermalit dhe Elvanës, “Dy gisht mjaltë”, nuk ka qenë ajo që u aludua në mediat rozë. Ka qenë vetë Ermali i ftuar në “Wake Up” që ka zbuluar arsyen e vërtetë dhe që nuk ka lidhje me jetën personale të këngëtares.
“Është e vërtetë që ne bëmë një prezantim të një date të mundshme që ishte 14 shkurti, po për efekte teknike filmi u shty, sepse duke qenë se montazhi është bërë në Stamboll, pjesa kryesore e ekipit të xhirimit ka ardhur e gjitha nga Turqia. Janë ata që kanë bërë “Sulltani i madhërishëm”, tha Ermali.
Ai na zbulon se ka qenë dëshirë e Elvanës që të bënte një film, dhe projektin e tij e kishte gjysmë gati. “Me thënë të drejtën ka qenë një dëshirë e Elvanës që në një nga këto darkat thoshte kam qejf të bëj dhe unë një film. Unë e kishë një gjysmë ide të shkruar dhe kur Elvana dha idenë e orientova direkt, pastaj më vonë teksti është shkruar duke marrë parasysh këto dy personazhe”, thotë Ermali.
Në kastin e këtij produksioni ka edhe shumë emra të njohur si Koço Devole, Marjana Kondi, Natasha Lako, Bujar Asqeriu, Ervin Bejleri, Rezart Veleshnja, Eglein Laknori e shumë të tjerë.
Në këtë film do të shikojmë edhe kryetarin e Bashkisë së Tiranës, Erjon Veliaj, teksa bën celebrimin e çiftit.
Duke filluar nga data 28 Mars, ky film do të jetë në të gjitha kinematë në Shqipëri, Kosovë dhe Maqedoni.