Zbatimi i faljes së detyrimeve dhe skemës së pagesës “50 me 50” ka sjellë rezultate pozitive si në mbledhjen e të ardhurave, ashtu edhe në pastrimin e profileve tatimore të bizneseve. Kontabilistja Etleva Treska e vlerëson këtë proces si një ndërhyrje rrënjësore, që u dha zgjidhje shumë subjekteve të bllokuara prej vitesh nga detyrimet e pashlyera.
Sipas saj, të dyja mekanizmat – falja e detyrimeve dhe skema “50 me 50” – kanë funksionuar me sukses, duke ndihmuar si administratën tatimore në arkëtimin e të ardhurave, ashtu edhe bizneset në normalizimin e situatës së tyre fiskale.
“Opsioni për të paguar gjysmën, që të falet gjysma ka qenë aktive. Sa i përket mbledhjes së të ardhurave të dyja kanë funksionuar, si ligji i faljes, po ashtu edhe mbledhja 50 me 50. Shumë subjekte që rezultonin me detyrime nuk ishin çregjistruar dhe rezultonin aktiv, por ato kishim mbetur peng të faljes së detyrimeve. Faqet tatimore të çdo biznesi është pastruar totalisht. Shoh një veprim rrënjësor.”
Ekspertja nënvizon se, krahas pastrimit të profileve tatimore, janë bërë edhe hapa të rëndësishëm në përmirësimin e procedurave fiskale, duke përmendur si shembull rimbursimin.
“Ka shumë hapa pozitivë. Rimbursimi nuk është vetëm në letra, është zbatuar. Ato që nuk arritën që në vitin 2025 nuk arritën që të kishin fatura, duhet të ruajnë faturat fiskale që të përfitojnë”, tha Etleva Treska.