Policia ka dhënë detaje lidhur me sekuestrimin e një sasie prej 11 mijë farash kanabisi të cilat kishin ardhur me postë nga Spanja.
Sipas policisë në sajë të operacionit të koduar “Kostumi”, u konstatua pakoja postare e dyshimtë ku pas kontrollit u zbulua dhe sasia e drogës. Policia ka arrestuar poseduesin e tyre në momentin që ai ka mbërritur në pikën e postës për të marr pakon dhe bëhet fjalë për një 30-vjeçar nga Vlora.
Lexo edhe- E pa dëgjuar më parë/ Vlorë, mbërrijnë me postë nga Spanja 11 mijë fara kanabis
NJOFTIMI I PLOTE
Vlorë
Finalizohet operacioni policor i koduar “Kostumi”.
Operacioni nga Drejtoria Hetimore Qendrore në Departamentin e Policisë Kriminale, në bashkëpunim me Departamentin Operativo-Hetimor të Drejtorisë së Përgjithshme të Doganave dhe Drejtorinë Vendore të Policisë Vlorë.
Sekuestrohen 11.000 fara cannabis sativa.
Në vijim të goditjeve të njëpasnjëshme të zhvilluara nga strukturat e Policisë së Shtetit për parandalimin, evidentimin dhe goditjen e veprimtarisë kriminale në fushën e kultivimit dhe trafikimit të narkotikëve, nga Drejtoria Hetimore Qendrore pranë Drejtorisë së Përgjithshme të Policisë së Shtetit, në bashkëpunim të ngushtë me Departamentin Operativo-Hetimor të Drejtorisë së Përgjithshme të Doganave dhe Drejtorinë Vendore të Policisë Vlorë, u organizua dhe finalizua operacioni policor i koduar “Kostumi”.
Pas informacioneve të marra më datë 14.05.2020, u bë e mundur që në Degën Doganore Tiranë të konstatohej një pliko postare me përmbajtje të dyshimtë, e ardhur nga Spanja, me destinacion qytetin e Vlorës.
Specialistët e Njësisë për Hetimin e Narkotikëve dhe Trafiqeve në Drejtorinë Hetimore Qendrore e referuan në Prokurorinë e Rrethit Gjyqësor Tiranë, për fillimin e ndjekjes penale, për veprën penale “Trafikim ndërkombëtar i lëndëve narkotike” dhe nën drejtimin e Prokurorisë prej disa ditësh u ndoq me metoda speciale të hetimit.