Drejtori i Përgjithshëm i Shërbimit të Transportit Rrugor, Blendi Gonxhja deklaron se 240 mjete nuk e kanë kaluar testin e kontrollit teknik në vetëm 15 ditë, që nga fillimi i implementimit të Certifikatës së re të Kontrollit Teknik, si pasojë e ndërhyrjeve abuzive në kilometrazh.
Sipas tij, të gjitha mjetet që rezultojnë me difekt anomali në kilometrazh, kavo të këputur, matësa difektoz, do të pajisen me certifikatë kolaudimi vetëm pas rregullimit dhe përditësimit të statusit të kilometrave, si edhe do t’u shënohet historiku real në certifikatë.
“Kjo e dhënë do jetë publike nga janari 2023 për çdo të interesuar që kërkon të informohet për një mjet”, informoi Gonxhja.
Për rastet kur zotëruesit e mjeteve rrugore trashëgojnë një status që është abuzuar nga shitësi apo zotërues të mëparshëm, kreu i DPSHTRR nxit qytetarët që të denoncojnë më tej në polici e në organet kompetente.
Ndërkohë, Gonxhja thekson se nga janari 2023 çdo mjet i përdorur do targohet për herë të parë vetëm pas leximit me mjete inteligjente dhe dokumentimit në sistem të statusit real fillestar të odometrit.