Presidenti i Komitetit Olimpik Kombëtar SHqiptar, Fidel Ylli, ka zhvilluar një mbledhje ditën e sotme me Ministrinë e Arsimit dhe të Sporteve, ku ndër të tjera ka prezantuar edhe idenë e tij për rihapjen e basteve sportive. Teksa u shfaq i pezmatuar nga buxheti i qeverisë për sportin, ai tha se rikthimi i basteve të kontrolluara nga qeveria mund të sjellë shumë të ardhura për shtetin, ku një pjesë e të atyre që do mblidhen nga taksat të shkojnë për sportin.
“Ne duam që këto para t’i kontrollojë qeveria, jo Federata, as KOKSH-i, por vetë qeveria sepse mbledh të ardhura jo vetëm për sportin. Janë miliona euro, e dinë të gjithë. Ato para të shkojnë për sportin, për këto kampionë që janë këtu me mua që e kanë nderuar Shqipërinë.
Ne patëm një mundësi që na dhanë 200 milionë lekë Ministria për në Olimpiadë dhe ne ia akorduam sportistëve tanë që të stërviten dhe me ato stërvitje dhanë rezultat, me një kampion bote dhe dy medalje të tjera në stilin e shkëputjes në Uzbekistan”, tha Ylli.