Deputeti i PD-së dhe i grupit të Rithemelimit, Flamur Noka pas vizitës në SPAK, përballë gazetarëve tha se vizitat e tij në Prokurorinë e Posaçme do jenë të shpeshta sepse ka shumë për të për denoncuar.
Në një kohë kur “Rithemelimi” ka hedhur akuza mbi SPAK-un duke e cilësuar si “organ të qeverisë”, Noka tha se këto denoncime për procesin zgjedhor të 14 maj do të jenë një provë për ta. Për Nokën, këtu mund të kuptohet mjaft mirë nëse SPAK është një organ i pavarur siç pretendohet të jetë, apo është “nën sqetullën e qeverisë”.
“Do të denoncojmë përditë farsën elektorale dhe manipulimin e deformimit të vullnetit të shqiptarëve. Janë shumë kallëzime, do më shihni shpesh në këto dyer, se kam detyrën që t’i qëndroj përballë këtij regjimi për të denoncuar çdo batërdi. E kemi akuzuar dhe do vazhdojmë ta akuzojmë SPKA, është organi i drejtësisë, kanë një mundësi për të dalë jashtë xhepit të qeverisë, kjo është një provë a janë në xhepin e qeverisë apo janë nën sqetullat e qeverisë”, tha Noka.