Pastruesja Rozeta Dobi ka deklaruar se ka marrë 10 mijë euro nga ish-zyrtarja Alda Klosi, me qëllim që të fshihte në banesën e saj shumat e mëdha të parave. Dobi ka treguar se Klosi, për vjedhjen e parave kërkonte të fajësonte ish-bashkëshortin.
“A. Klosi më dha 10 mijë euro për të fshehur paratë, më premtoi edhe tharëse rrobash,”- ka deklaruar Dobi.
Referuar dosjes hetimore, ajo është shprehur se përveç parave, Klosi i ka premtuar edhe një tharëve rrobash, që do ia blinte sapo të këthehej nga Amerika. Rozeta Dobi që aktualisht po mbahet e arrestuar me akuzën e vjedhjes së kryer në bashkëpunim, ka treguar për hetuesit se Klosi e paguante 20 euro në ditë për të pastruar banesat, ndërsa vjedhjen e parave në apartamentin që ndodhet në Rrugën e Kosovarëve, dhjetorin e kaluar e kanë inskenuar.
“Pasi mora paratë. kam vajtur në banesën e Aldes, kam sistemuar rrobat që i kisha bërë rremujë të enjten, kam pastruar shtepinë, dhe në fund ka ardhur Alda e cila më ka bërë pagesën e muajit 100 euro, më pas më ka dhënë edhe shumën e shpërblimit 10.000 euro. Për tharësen më ka thënë se do të shikoj se si do më eci puna dhe kur të kthehem nga Amerika do ta blejë”.
Dobi pranoi të bashkëpunojë me prokurorinë dhe të tregojë me detaje për shumat e mëdha të parave që ajo pretendon se nuk i vodhi, por ia dha vetë Klosi, pas konflikteve që ajo kishte me ish-bashkëshortin. Dobi u ndje e tradhtuar nga ish-zyrtarja dhe për këtë ndryshoi dëshminë e saj.