Në Bashkinë e Matit nisën sot vitin e ri shkollor 3300 nxënës. 30 objekte janë mirëpërgatitur nga Ndërmarrja e Shërbimeve Bashkiake. Shkollat janë lyer, suvatuar, dezinfektuar, pajisur me termometra digjital, dezinfektantë, etj.
Para fillimit të mësimit u krye kontrolli i temperaturës. U zbatua distancimi dhe pajisja me maska.
Kryebashkiaku Agron Malaj ka uruar nxënësit dhe mësuesit për vitin e ri shkollor, ndërsa apelon për respektim të protokollit të sigurisë.
“Suksese të gjithë fëmijëve në këtë vit të ri shkollor të pazakontë.
Sfidues për ata që rikthehen në bankat e shkollës pas kaq muajsh qē nga fillimi i Pandemisë Covid 19.
Sfidues dhe për ata që sot i drejtohen për herë të parë stacionit fillestar në rrugën e gjatë të dijes.
Këtë vit s’do mund të takojmë mësuesit dhe shokët tanë për shkak të distancimit social që duhet të respektojmë për të ruajtur shëndetin tonë dhe të dashurve tanë.
Por, këtë vit ne mund dhe duhet të përkushtohemi në mësime dhe të marrim sa më shumë dije që do na ndihmojnë për ta bërë më të bukur jeten tonë.
Bashkia Mat i ka marrë të gjitha masat duke bërë dezinfektimin e të 30 objekteve arsimore, kemi rikonstruktuar, lyer, bërë riparime në nyjet sanitare dhe në sistemin elektrik në të gjitha shkollat.
Ju duhet vetëm të respektoni kushtet e reja, të ruani shëndetin tuaj dhe ne do kujdesemi që këto ambiente të jenë të sigurta për ju”, shkruan Malaj.
