Në kuadër të samitit mes Bashkimit Europian dhe Ballkanit Perëndimor, 27 liderë të vendeve anëtare të BE së bashku me udhëheqësit e rajonit u pritën këtë të martë në sheshin “Italia” në kryeqytet.
Gjatë ceremonisë së mirëpritjes, paraqitja e një prej liderëve të unionit nuk i ka shpëtuar syrit të fotografit Armando Babani.
Ky i fundit ka publikuar në llogarinë e tij në “Facebook” një foto të shkrepur nga vetë ai, ku shfaqen këpucët e një prej liderëve, të cilat duken të tejpërdorura.
“Kryeministri i kujt vendi pjesmarres ne Summit eshte mbajtesi i kepuces? (Sa per ndihme NUK eshte KM Shqiptar)”, pyet Babani.
Në sektorin e komenteve, autori i fotos zbulon se këpucët i përkasin kryeministrit të Holandës, Mark Rutte.
Kujtojmë se sot u nënshkrua marrëveshja e parë mes operatorëve telefonikë të BE-së dhe Ballkanit Perëndimor për uljen e tarifave roaming, marrëveshje kjo që pritet të vihet në zbatim nga tetori i vitit 2023.