Ministri i Drejtësisë Ulsi Manja, në një deklaratë për mediat bëri të ditur se projekti i ri për ndyshimet në Kodin Penal, brenda 1 viti do të lançohet për konsultim publik. Ndërsa sqaroi se po përgatitet një amnisti e përgjithshme në burgjet shqiptare, por pa dhënë një datë se kur ky draft do të jetë gati.
Të gjithë të burgosurit që ndodhën në burg për vepra jo të rëndë penale dhe janë në afatet e fundit të qëndrimit në burg do të mund të përfitojnë nga amnistia.
Lajmin e bëri të ditur vetë ministri i drejtësisë Ulsi Manja ku tregoi se paketa ligjore është në fazat e përfundimtare të përgatitjes
“E shfrytëzova këtë takim edhe për t’u bërë thirrje kolegëve të mi avokatë, që të bëhen pjesë oponencës të projektit të ri të Kodit Penal, i cili besoj shumë shpejt brenda këtij viti do të lançohet për konsultim publik. Lidhur me amnistinë penale, unë herë pas here jam prononcuar që do të kemi një amnisti penale për të dënuarit. Po do ta kemi edhe amnistinë”, deklaroi Manja.
Ministri u shpreh se kjo amnisti po kryhet jo vetëm si akt human, por edhe për shkak të mbipopullimit në burgje.
“Edhe pse zakonisht bëhet në fund të vitit por ka disa kohë që është shtyrë kjo tabu. E rëndësishme është që të kemi një amnisti penale dhe ma besoni se nuk ka njeri më të interesuar për një amnisti se sa një Ministër Drejtësie”, tha ai.