Që nesër burgjet kalojnë në gatishmëri, për të parandaluar cdo ngjarje të paligjshme në vendet e vuajtjes së dënimit. Burime të sigurta pranë Burgut të Sigurisë së Lartë Burrel bënë me dije se Drejtoria e Përgjithshme e Burgjeve ka urdhëruar kalimin në gatishmëri të administratës dhe forcave të ruajtjes së rendit. “Nuk është qartësuar nëse do të jemi në gatishmëri numër dy apo tre, por që do të kalojmë në gatishmëri është e sigurtë”, thanë gardianë të Burgut të Burrelit. Sipas tyre kjo është normale kur dihet që të dënuarit, sidomos ato me burgim të përjetshëm tentojnë arratisjen nga qelitë e burgjeve. Të njëjtat burime saktësojnë se afro 30 % e efektivave të burgjeve do të jenë pranë burgjeve. “Sot ka mbërritur pranë cdo burgu shkresa e DPB ku përcakohen masat që duhen marrë në prag të ndërrimit të viteve si dhe numri i punonjësve që do të qëndrojnë në gatishmëri. Drejtues e gardianë nisin gatishmërinë nesër rreth orës 15.00 dhe do ta mbyllin me datë 03.01.2019 po në këtë orë”, pohuan zyrtarë të këtij institucioni. Ditë më parë në këtë burg u organizua një grevë urie dhe pas ndërhyrjes së Drejtorisë së Burgjeve ajo u mbyll. Ndërkohë dy ditë më parë autoritetet kanë rritur masat e sigurisë pasi këtu është rikthyer Admir Tafili, një i dënuar mjaft problematik për Policinë e Burgjeve. / P. Hasa /
Add A Comment