Gennaro Gattuso ka folur për çështjen “Higuain” në konferencën për shtyp përpara finales së Superkupës së Italisë. Gazetarët kanë ngacmuar trajnerin mbi sulmuesin argjentinas dhe faktin nëse do të largohet ose jo. Sakaq, vetë Pipita, në postimin e bërë në faqen zyrtare në Instagram, ka hedhur tre fotografi ku duket i qeshur, nga stërvitjet në Xhedah, Arabi Saudite.
“Do ta hedh në fushë sepse e shoh mirë, të qetë. Ose është një aktor i madh dhe unë nuk e kuptoj dot. E shoh brenda projektit. Bën shaka, është një radio. Nuk ndalet kurrë. Pas ndeshjes me Juven, diçka ndodhi në kokën e tij. Të shohim. Por, t’i ndryshosh mendje një lojtari nuk është e lehtë. Ende nuk ka ardhur të më thotë “mister, duhet të iki!”.
“Bazohem për mënyrën se si jeton grupi, për mënyrën se si qëndron në kontakt me stafin. Ka shumë zëra. Po stërvitet mirë me shokët. Eshtë në dispozicion. Të shohim luan ose jo. Të shohim se çfarë do të bëjë për të sistemuar këtë çështje”.