Gazetarja Anduela Llabani, thotë se fëmijët e Liridonës që u vra në fund të 2023, kanë qenë të traumatizuar nga ngjarja e rëndë, ku nëna e tyre u vra në mënyrë brutale me porosi të të atit. Në emisionin “Now me Erla Mëhillin”, Llabani tha se pas ngjarjes, njëri prej fëmijëve teksa po pyetej nga një psikologe, vizatoi një ujk dhe tha ”ky është babi”.
“Ka edhe dy fëmijë, të cilët ditën e ngjarjes janë marrë në pyetje nga një psikologe. Ka një detaj shumë të rëndësishëm që tregon për marrëdhëniet mes dy prindërve. Kur i është ulur njëri nga djemtë në tavolinë për t’u marrë në pyetje nga psikologia, ai ka vizatuar një ujk dhe pretendonte se ujku ishte babai i tij.
Dhe nuk kanë dashur asnjëri nga fëmijët të jenë të gatshëm për të komunikuar me psikologen. Pra fëmijët duket se kanë pasur një lloj traume që lidhet me subkoshiencën e tyre në familje. Naimi është edhe një manipulator në këtë histori. Ne kemi shumë Naima, por ky Naimi veçse ishte patologjikisht i sëmurë, por duket se nuk e ka dashur familjen e tij”, tha Llabani.