Georgina Rodriguez ka reaguar pas kritikave të shumta që morën fotot e saj me rroba banje, duke u shprehur se vlera e një personi nuk duhet të përcaktohet nga pamja fizike apo opinionet e të tjerëve.
Influencuesja publikoi sërish disa foto me bikini, përfshirë edhe ato që kishin shkaktuar reagime në rrjet, ndërsa iu drejtua komenteve negative për trupin e saj.
“Trupi im do të ndryshojë, siç ndryshojnë të gjithë trupat e grave. Dhe shpresoj që kjo të vazhdojë të ndodhë për shumë vite që do të vijnë, sepse kjo do të thotë që unë jam ende gjallë”, u shpreh Georgina.
Ajo theksoi se është nënë e gjashtë fëmijëve dhe se një nga mesazhet më të rëndësishme që dëshiron t’u përcjellë vajzave të saj është që vlera e tyre të mos lidhet me pamjen e jashtme.
“Së bashku me Cris-in, për të cilin jam thellësisht krenare për vlerat që ai mishëron si baba dhe si burrë, dua t’u mësoj fëmijëve të mi se vlera e një personi nuk mund të varet kurrë nga pamja e tij fizike apo nga mendimet e të huajve”, tha ajo.
Georgina tregoi se komentet për fotot e saj e kanë bërë të diskutojë edhe me partnerin e saj, Cristiano Ronaldo, i cili sipas saj e ka mbështetur duke i kujtuar se rëndësi ka ajo që është si person.
Ajo tha se çdo verë trupi i saj bëhet pjesë e diskutimeve publike dhe ngriti pyetjen se kush përcakton standardet e bukurisë.
“Kush vendos se çfarë është një trup i duhur? A mendojmë ende vërtet se lumturia ka një madhësi?”, u shpreh Georgina.
Ajo shtoi se stërvitja për të nuk është një mënyrë për të luftuar peshën, por një mënyrë për t’u kujdesur për veten, duke i dhënë shëndet, energji dhe mirëqenie.
“Unë stërvitem sepse më bën të lumtur. Sepse jam e apasionuar pas saj. Ajo orë në palestër është një nga momentet më të mira të ditës sime”, tha ajo.
Në fund, Georgina u shpreh se suksesi për të nuk lidhet me përshtatjen me standarde të vendosura nga të tjerët, por me të jetuarit në paqe, të qenit pranë njerëzve të dashur dhe kujdesin për shëndetin e saj.