Një 22-vjeçar humbi jetën tragjikisht në Sardenja të Italisë, duke u mbytur në një pus në tentativë për të shpëtuar qenin e tij.
Viktima është identifikuar si Danilo Sulas.
22-vjeçari nga San Teodoro, i cili u gjet i vdekur mëngjesin e sotëm në fshatin Lutturai, kishte shkuar në tokën e familjes për të përgatitur varkën për një udhëtim peshkimi.
I riu u hodh në pusin rreth gjashtë metra të thellë, 3 metra prej të cilave të mbushura me ujë, në përpjekje për të shpëtuar qenin e tij të vogël, i cili nga ana e tij mund të ketë rënë aksidentalisht në pus duke ndjekur një mace.
Të dyja kafshët në fakt u gjetën në fund të pusit.
Danilo ishte zhdukur nga shtëpia që prej pasdites së djeshme dhe në orët e mbrëmjes familjarët dhe miqtë, duke mos pasur më asnjë lajm prej tij, filluan të shqetësoheshin.
Mëngjesin e sotëm, makina e djalit është vënë re në pronën e familjes së babait të tij, i cili duke iu afruar pusit ka kuptuar menjëherë se çfarë kishte ndodhur dhe ka lajmëruar shërbimet e shpëtimit.