Mbrëmjen e djeshme, rreth orës 19:00, familja Zhuku nga fshati Fshat në Bashkinë e Klosit ka informuar policinë lokale se kryefamiljari Xhemal Zhuku kishte humbur çdo kontakt me familjen që në orët e para të mëngjesit.
Menjëherë pas marrjes së njoftimit, shërbimet e Policisë, në bashkëpunim me familjarët, kanë nisur kërkimet për gjetjen e tij. Banorë të fshatit kanë treguar se e kishin parë afër lumit Mat dhe sipas tyre ai mund të ishte mbytur duke tentuar kalimin nga njëra anë e lumit në tjetrën.
Si rezultat i kërkimeve, mëngjesin e sotëm, në rrjedhën e lumit Mat, në fshatin Fshat, u gjet trupi i pajetë i shtetasit Xhemal Zhuku, 66 vjeç.
Nga veprimet paraprake të kryera, dyshohet se 66-vjeçari, gjatë tentativës për të kaluar lumin, është marrë nga rrjedha e tij dhe për pasojë, ka humbur jetën.
Grupi hetimor ndodhet në vendngjarje dhe po kryen veprimet hetimore për sqarimin e plotë të rrethanave të rastit.