Ish-kryeministri Sali Berisha ka publikuar në llogarinë e tij në “Facebook” mesazhin e një qytetari, i cili denoncon se prej 15 ditësh, inspektorët e higjienës kanë dalë për të kryer kontrolle masive në farmacitë e vendit.
Në mesazh nënvizohet se grupet e kontrollit kanë gjobitur farmacistët për materiale që i kanë me faturë të fiskalizuar. Sipas tij, ata gjithashtu bëjnë presion për gjoba që varijojnë nga 5-10 milionë lekë.
Duke marrë shkas nga mesazhi, ish-kryeministri iu bën thirrje farmacistëve që të kalojnë në greva të përgjithshme.
“Gjoba masive antiligjore farmacive në mbarë vendin!
Dënoj me ashpërsinë më të madhe dhunën me gjoba ndaj farmacive të vendit.
U bëj thirrje farmacistëve në mbarë vendin të kalojnë në grevë të përgjithshme për të mbrojtur biznesin e tyre!
Lexoni mesazhin e qytetarit dixhital.
– – – – – –
Uroj te jeni mire:Ne dijeni prej 15 diteve ne grupe te higjenes kan dale dhe bejn kontroll ne farmaci gjobisin farmacite per material qe i kan me fature te fiskalizuar,nuk paraqesin liste cfar kontrollojm por bejn presion per gjoba 5-10 milion lek dhe marrin per ta mbyllur problemin 1 milion lek.Faj esht i ministrise shendetsise dhe i kontrollit qe nuk shkon tek burimi gabimit.Flm”, shkruan Berisha.