Nesër matjanët do të përballen në transfertë me ekipin e Butrintit të Sarandës. Prej disa vitesh këto skuadra nuk kanë luajtur me njëra-tjetrën sepse Kategoria e Parë ishte ndarë në dy grupe, Veri-Jug.
Burreli vjen në javën e tretë me dy pikë, dy barazime, një me Tërbunin e Pukës dhe një me Tomorin e Beratit. Drejtues, specialistë e tifozë të Burrelit kërkojnë më shumë nga skuadra e Patushit.
Ndeshja me Butrintin për drejtorin teknik Klevis Gjoka nuk konsiderohet e lehtë, por kërkohet nga lojtarët të japin maksimumin dhe të tentojnë tri pikë.
“Për ne është ndeshja e radhës. Por Butrinti ashtu si çdo ekip pritës do të kërkojë maksimumin në këtë përballje. Ne nuk do të ndryshojmë asgjë nga taktika jonë. Do të luajmë për pikët maksimale dhe shpresoj të jetë ndeshja e kthesës, pra të marrim fitoren e parë të këtij sezoni. Djemtë janë të motivuar shumë dhe presim më të mirën. Mungesa nuk do të ketë, ndërsa formacionin kryesor e ruajtëm në ndeshjen e Kupës me Besëlidhjen”, u shpreh Gjoka.