Një gjykatë në Pekin ka urdhëruar një burrë që të kompensojë gruan e tij për punët e shtëpisë që ka bërë gjatë martesës së tyre. Gruaja do të marrë 50,000 juanë (7,700 dollarë) për pesë vjet punë të papaguar.
Rasti ka gjeneruar një debat të madh në internet mbi vlerën e punës në shtëpi, me disa që thonë se shuma e kompensimit ishte shumë e vogël. Vendimi vjen pas prezantimit nga Kina të një Kodi të ri Civil. Sipas të dhënave të gjykatës, burri kishte bërë kërkesë për divorc, vitin e kaluar nga gruaja e tij pasi u martua në 2015. Ajo hezitoi të divorcohej në fillim, por më vonë kërkoi kompensim financiar, duke argumentuar se burri nuk kishte marrë përsipër asnjë punë shtëpie ose përgjegjësi për kujdesin e djalit të tyre. Gjykata e e Pekinit vendosi në favor të saj, duke e urdhëruar burrin e saj të paguante detyrimin ushqimor mujor prej 2,000 juanë, si dhe shumën e 50,000 juanve për punët e shtëpisë që ajo ka bërë.
Kryetari i trupit gjykues u tha gazetarëve të hënën se ndarja e pasurisë së përbashkët të një çifti pas martese zakonisht përfshin ndarjen e pasurisë së prekshme. “Por punët e shtëpisë përbëjnë vlerë pasurore të paprekshme”, tha gjykatësi.
Vendimi u bë sipas Kodit të ri Civil në vend, i cili hyri në fuqi këtë vit. Sipas ligjit të ri, një bashkëshort ka të drejtë të kërkojë kompensim në një divorc nëse ai ose ajo mban më shumë përgjegjësi në rritjen e fëmijëve, kujdesin për të afërmit e moshuar dhe ndihmën e partnerëve në punën e tyre. Më parë, bashkëshortët që divorcoheshin mund të kërkonin një kompensim të tillë vetëm nëse ishte nënshkruar një marrëveshje paramartesore, një praktikë e pazakontë në Kinë.