Darrell Brooks është dënuar me 6 burgime të përjetshme, pasi është shpall fajtor për të njëjtin numër vrasjesh me dashje gjatë paradës së Waukesha-s, në Wisconsin të SHBA-së.
40-vjeçari u njoh me dënimin pasi një juri e gjykatës në Waukesha e shpalli atë fajtor më 26 tetor për 76 akuza penale, duke përfshirë 6 akuzat për vrasje me dashje.
Gjykatësja shpërtheu në lot përpara dhënies së vendimit, teksa kujtoi historitë e viktimave të tij. Ajo shtoi edhe 1067 vite burgim në mënyrë simbolike për të nënvizuar ashpërsinë e krimeve për të cilat tha se Brooks nuk tregoi asnjë pendesë. Gjykatësja Jennifer Dorow rrëfeu se kishte parë skenat e asaj që kishte ndodhur në nëntor të vitit të kaluar.
Para trupit gjykues, autori tha se ai kishte kaluar një jetë të vështirë, ishte rritur pa baba, i varfër dhe shpesh i uritur teksa rritej në banesa të mbushur me minj e insekte. Brooks tregoi se kishte pasur probleme mendore në moshë të re, ndërsa nuk kishte në plan të kryente krimin e tmerrshëm.
