Në mediat sociale qarkulloi një video, ku shihej një i ri teksa godiste efektivin e policisë, të cilit më pas i ikën nga duart.
Pas publikimit të kësaj videoje, blutë e kryeqytetit kanë reaguar duke njoftuar se autori F.S, 22 vjeç, është kapur nga forca të tjera të policisë, bashkë më vëllanë e tij. Policia njofton se 22-vjeçari është arrestuar më 26 mars për veprën penale “Kundërshtimi i punonjësit të policisë së rendit publik”.
Gjithashtu, për këtë rast, ka nisur procedimi në gjendje të lirë për vëllanë e të riut, shtetasin Xh. S., 26 vjeç, banues në Tiranë.
“Rreth orës 23:00 të datës 25 mars në rrugën “Aleksandri i Madh”, në Unazë të Re, shërbimet e Patrullës së Përgjithshme kanë konstatuar shtetasit F. S. dhe Xh. S. (vëllezër), të cilët dyshohet se kanë qenë duke konsumuar lëndë narkotike kanabis. Në momentin e ndërhyrjes së Policisë, shtetasi Xh. S. është larguar me vrap, ndërsa shtetasi F. S., gjatë ndalimit, ka kundërshtuar me forcë punonjësin e Policisë. Shtetasi F. S. ka mundur të largohet, por pas ndërhyrjes së shërbimeve të tjera të Policisë, është kapur, së bashku më vëllanë e tij, dhe më pas janë kryer veprimet procedurale, në drejtimin e Prokurorisë”, thuhet në njoftim.