Google vjedh tekstet e këngëve dhe i nxjerr ato në motorin e tij të kërkimit. Në këtë mënyrë u heq trafikun faqeve të internetit që merren me këtë punë. Ai që ka bërë akuzën është Genius Media Group, që thotë se ka prova për këtë.
Por Mountain Vievv mbrohet duke thënë se tekstet janë furnizuar me licencë nga partnerët, dhe do ti japë fund raporteve me ata që nuk ndjekin “praktikat e mira”.
Sipas Wall Street Journal, Genius thotë se ka kontaktuar me Google në 2017 dhe hera e fundit ka qenë në prill të këtij viti. Kolosit të Internetit kompania i ka bërë të ditur se ripërdorimi i transkriptimeve të tij dhunon kushtet e përdorimit të faqes, dhe për më tepër ligjin antitrust.
Më herët nëse kërkoje një tekst këngësh motori i Google të drejtonte në faqet e specializuara për këtë, si genius.com, që ofron tekste muzikore sidomos të llojit hip hop.
Tani, në të njëjtin kërkim Google të tregon direkt tekstin e këngës që kërkon, duke i bërë të panevojshme këto faqe. Dhe kjo është arsyeja e ankesës së Genius.