Detaje të tjera janë zbuluar nga grabitja e pikës së këmbimit valutor në zonën e “5 Majit” në Tiranë, ngjarje që ndodhi mëngjesin e 5 marsit. Autori, L.M., fillimisht i ka mohuar akuzat para policisë dhe ka deklaruar se nuk ishte ai autori i grabitjes së 300 mijë lekëve.
Por, efektivët e Komisariatit nr. 4 gjetën rrobat që përdori në grabitje, brenda në lavatriçe, prova të rëndësishme për dokumentimin e ngjarjes, përveç pamjeve të kamerave të sigurisë. Më pas, ai pranoi se ishte autor i grabitjes dhe tregoi arsyen dhe planin.
“Kisha planifikuar që grabitjen ta bëja që më përpara. Por, pas grabitjes me armë të bankës në zonën e ish-Parkut u frikësova dhe mendova ta shtyja planin për më vonë. Isha i detyruar sepse kam shumë borxhe dhe kam nënën sëmurë, në gjendje shumë të rëndë”, tha ai.
Sapo kreu grabitjen, ai u largua i qetë dhe fillimisht në këmbë ka hyrë brenda tregut të Medresesë dhe nga aty ka dalë në anën e pasme nëpër rrugica.
Në një pusetë fillimisht ka fshehur pistoletën lodër, ka marrë një taksi dhe nga aty ka shkuar në shtëpi. Për t’u fshehur ka hequr mjekrën dhe fillimisht u ka thënë efektivëve se e kanë ngatërruar, sepse nuk ishte ai autor.
Autori rezulton i dënuar më parë për të njëjtën vepër penale.