Mediat maqedonase flasin për një mëngjes pune informal të ministrave të Jashtëm të BE-së dhe atyre të Maqedonisë së Veriut dhe Shqipërisë, mbajtur në Bruksel të hënën. Ky takim ka qenë me iniciativë të Greqisë, e sipas burimeve diplomatike greke që citohen, është në kuadër të përpjekjeve të shtetit helen për të ndihmuar dy vendet të marrin një datë.
Korrespondentja e MIA në Athinë thotë se pjesëmarrja e rreth 20 ministrave tregon rëndësinë e këtij procesi. Nisma e Greqisë është brenda kornizës së politikës së jashtme greke bazuar në agjendën e Selanikut, në të cilën Athina mbështet fuqimisht perspektivën evropiane të vendeve në rajon.
Burime diplomatike greke raportojnë se Athina do të bëjë gjithçka që mundet për të ndihmuar të dy vendet. “Greqia dëshiron të ketë fqinj të qëndrueshëm me një të ardhme evropiane në veri, dhe kur Maqedonia dhe Shqipëria të plotësojnë kushtet, ata mund të jenë aleatët më të mirë të Greqisë”, citon MIA.
Të njëjtat burime diplomatike greke thonë për MIA se Greqia është kundër ndarjes së Shqipërisë dhe Maqedonisë së Veriut, duke u shprehur se ato duhet të marrin një datë së bashku për çeljen e negociatave të pranimit në BE dhe theksojnë se ky proces është gjithashtu një proces i reformës së brendshme për vetë vendet.
