Paketa sociale 2 miliardë euro pritet të miratohet këtë javë nga parlamenti grek ndërsa kryeministri Mitsotakis do të shpallë masat e reja të rezistencës sociale. Masat e qeverisë do të kenë në focus shtresat shoqërore të cilat nuk mund të përballojnë rritjen e çmimeve.
Prioritet kanë qytetarët me të ardhura të ulëta vjetore, ndërsa do të vijohet me subvencionim masiv në llogaritë e energjisë elektrike dhe gazit për ngrohje. Subvencionimi i llogarive, sipas zëdhënësit të qeverisë përshin familje, biznese dhe fermerët.
Lidhur me karburantet, zëdhënësi ka deklaruar se do të përgatitet një platformë tepër lehtësuese, ka gjasa që të ulet direkt TVSH dhe taksat e tjera, me qëllim që konsumatori të paguajë kosto më të ulët sesa çmimet e shkruara në pikat e karburanteve.
Po ashtu do të miratohet shtyrja e subvencionimit për të njëjtat kategori në llogaritë e energjisë elektrike dhe lëndëve djegëse për ngrohje edhe në muajt Mars-Prill.
Në javën e Madhe të Pashkëve pritet të shpërndahet çeku i shtrenjtësisë në një numër të madh familjesh dhe individësh nga 300 euro deri në 400 euro.
Lista e përfituesve pritet të zgjerohet më shumë, me rritjen e ndjeshme të çmimeve të javës së fundit, kështu që qeveria po shqyrton ndryshimin e kritereve të përfituesve. Paketa e masave pritet të miratohet dhe zbatohet nga ky muaj deri në Pashkët Ortodokse, që sivjet festohen në 24 prill.