Ditët e fundit vendi është përfshirë nga një mot i keq, e ndërsa dje dhe sot, thuajse i gjithë territori është mbuluar nga reshjet e dëborës. Moti i keq dhe dëbora është bërë shkak edhe për pamundësinë e një nënë të re shtatzënë, nga Labinot-Katund, për transpositimin në maternitetin e Elbasanit, duke e detyruar të kryejë lindje natyrale në kushtet e shtëpisë.
Ka qenë infermierja e Qendrën Shëndetësore Labinot-Katund në Elbasan, Nazmie Demiri , e cila në kohë rekord i ka ardhur në ndihmë, duke asistuar në lindjen e foshnjës. Pasi është bërë e mundur edhe pastrimi i rrugës, nëna dhe foshnja e sapolindur janë transportuar për në ambientet e maternitetit të Elbasanit për të marrë ndihmën e nevojshme dhe më të specializuar.
Ndërkohë edhe deputeti Taulant Balla, në një postim në Facebook, ka shprehur mirënjohjen për infermieren si dhe ka përgëzuar nënën, tashmë të dy fëmijëve, për sjelljen në jetë të një foshnje të shëndetshme.
“Mirënjohje infermieres Nazmie Demiri në Qendrën Shëndetësore Labinot-Katund në Elbasan, e cila ja doli sot të asistojë me shumë sukses një nënë të re nga ky fshat në lindjen e fëmijës. Për shkak të reshjeve të mëdha të dëborës dhe bllokimit të përkohshëm të rrugës u bë i pamundur transporti në kohë në Spitalin e Elbasanit.
Prandaj infermierja Nazmie Demiri mori përsipër lindjen e fëmijës së dytë të nënës Luljeta Cora në Labinot-Katund, e asistuar edhe nga infermierja e dalë në pension Ismete Allushi.
Ardhja në jetë e bebes kaloi pa asnjë ndërlikim dhe me hapjen e rrugës nëna dhe bebja e porsalindur u transportuan nga autoambulanca në Maternitetin e Elbasanit për të vijuar trajtimin e nevojshëm të specializuar.
Urime familjes Cora!
Mirënjohje infermieres Nazmie Demiri”, ka shkruar deputeti dhe kreu i grupit parlamentar të PS, Taulant Balla.