Edhe faqja zyrtare e familjes mbretërore britanike ka rënë pre e një sulmi kibernetik, përgjegjës për të cilin mendohet të jetë grupi rus i hakerëve “Killnet”, të cilët ndanë një postim në Telegram duke pretenduar se qëndronte pas sulmit.
Royal.uk, faqja zyrtare në internet për informacione rreth Mbretit Charles, Mbretëreshës Camilla dhe familjes së tyre, nuk funksionoi për rreth 90 minuta të dielën në mëngjes (1 tetor), duke filluar nga ora 10:00.
Në faqen zyrtare të familjes mbretërore u shfaq mesazhi “error-i” dhe vizitorët nuk ishin në gjendje të hynin në faqen e internetit. Më vonë, ajo u kthye në funksionale përsëri, por me kontrolle shtesë të sigurisë për përdoruesit përpara se t’i lejonin të hynin.