Hapen vende të reja pune në Policinë e Shtetit. Përparësi studentët me mesatare mbi 8
Më shumë se 100 studentë, që kanë mbaruar me rezultate të larta, do të kenë mundësi të bëhen pjesë e Policisë së Shtetit, në disa sektorë ku mungojnë specialistët.
Me hyrjen në fuqi të ndryshimeve ligjore, pas pak ditësh në Akademinë e Sigurisë do të kenë mundësi të aplikojnë të gjithë studentët që kanë dëshirë t’iu bashkohen uniformave blu.
Kriteri kryesor është mesatarja mbi 8, ndërsa policia kërkon burime njerëzore kryesisht në degë deficitare për këtë organizatë, si ekonomia, financa, informatika, elektronika dhe jurisprudenca.
Studentët që do të përzgjidhen, do t’i nënshtrohen për 9 muaj një kursi intensiv në Akademinë e Sigurisë, për t’u emëruar më pas në sektorët e luftës kundër krimit ekonomiko-financiar, korrupsionit dhe krimit kibernetik.
Në përfundim të kursit, studentët do të marrin automatikisht edhe gradën nënkomisar. / TCH