Ka nisur zyrtarisht gara për zgjedhjen e Prokurorit të ri të Përgjithshëm, ndërsa kandidatura e parë është dorëzuar pranë Këshillit të Lartë të Prokurorisë (KLP). Prokurori i posaçëm i SPAK, Adnan Xholi, ka paraqitur kërkesën e tij, duke shprehur interesin për të marrë pjesë në procesin e përzgjedhjes.
Sipas gazetares së Top Channel, Anila Hoxha, Xholi është kandidati i parë që aplikon për drejtimin e organit të akuzës.
KLP hapi procedurën për përzgjedhjen e Prokurorit të Përgjithshëm përmes një thirrjeje publike, pasi mandati shtatëvjeçar i kreut aktual të organit të akuzës, Olsian Çela, përfundon në dhjetor të këtij viti.
Afati për dorëzimin e kandidaturave dhe dokumentacionit përkatës përfundon më 1 gusht, në orën 00:00. Pas mbylljes së aplikimeve, Këshilli i Lartë i Prokurorisë do të nisë fazën e verifikimit dhe vlerësimit të kandidatëve, në përputhje me procedurat e përcaktuara në ligj.