Gonzalo Higuain është rikthyer te Juventusi ndërsa këtë sezon duket një tjetër në krahasim me sezonin e mëparshëm. Argjentinasi u largua pas transferimit të Kristiano Ronaldos, por as aventura te Milani dhe as ajo te Çelsi nuk nxorën në pah cilësitë e tij të vërteta.
Kështu, këtë verë Higuain vendosi të vishte sërish fanellën bardhezi, ndërsa nuk pranoi oferta për t’u larguar. Edhe pse e dinte se vendi në formacion nuk ishte i sigurt, sërish sulmuesi provoi shanset e tij. Dhe deri më tani është një nga lojtarët më të rëndësishëm për Mauricio Sarri, ndërsa golat e tij kanë vendosur ndeshjet në disa raste. Tashmë që Higuain ka rigjetur buzëqeshjen kërkon të mos largohet nga Torino.
31-vjeçari ka një kontratë deri në vitin 2021, të cilën kërkon ta rinovojë për të mbyllur karrierën me ngjyrat bardhezi. Pengesa e vetme është çështja e pagës. Nëse sulmuesi pranon që në rinovimin e kontratës të ulë rrogën e tij aktuale prej 15 milionë euro, atëherë Juventusi mund t’i japë dritë jeshile rinovimit dhe në këtë formë “pipita” mund realizojë ëndrrën për të qëndruar deri në fund me “Zonjën e Vjetër”.