Një efektiv policie 59-vjeçar nga Casertano, Itali, është me arrest shtëpie si pasojë e akuzave për sekuestrim personi, dhunë, zhvatje, kërcënim dhe keqtrajtim.
Hetimet nisën si pasojë e zbulimit të disa fotove kompromentuese të vlerësuesit të komunës, nga ana e agjentëve të komisariatit vendas.
Burri, duke u gjendur në situatë të sikletshme, ka rrëfyer se ishte detyruar nga i pandehuri për të pozuar në foto të sikletshme, pasi ishte marrë peng në një apartament, ishte kërcënuar e dhunuar fizikisht (shqelma, grushta dhe shpulla).
Fotot u përdorën më pas si presion për ta detyruar burrin të paguajë 5 mijë euro. Por, shuma nuk ka qenë e mjaftueshme dhe kështu fotot iu dërguan marrësve të ndryshëm nga ana e policit, me qëllim shkatërrimin e reputacionit të ‘fatkeqit’ në mënyrë që të rritej shuma deri në 200 mijë euro.
Deklaratave të viktimës, policia gjyqësore i shtoi edhe faktet e mbledhura, duke nxjerrë kështu urdhrin për arrestimin e policit.
Hetimet çuan në gjetjen e keqtrajtimeve të rënda në adresë të ish-bashkëshortes, e cila sot jeton në një lokalitet që mbahet sekret, në mënyrë që i pandehuri të mos e gjejë.
Gruaja, përveçse ishte e detyruar të pozonte, në shumë raste ishte goditur me shqelma dhe grushta.