Orjana Gremi është 32-vjeçarja që hodhi në lumin Kir foshnjën e saj. Djali kishte ardhur në jetë më 30 dhjetor dhe ajo e kishte regjistruar në maternitetin e Shkodrës pa atësi.
Sajmir Selmanaj, mjek roje i maternitetit në Shkodër natën kur Orjana Gremi lindi djalin e saj, ka dhënë një prononcim për mediat, por jo nën praninë e kamerave.
Ai tregoi se natën e 30 dhjetorit, Orjana Gremi solli në jetë të birin rreth orës 11:40. Sipas tij, 32-vjeçarja ka qenë e vetme në maternitet dhe se ajo nuk e donte fëmijën.
“Në momentin kur është shtruar, nuk e kam shtruar unë, pra unë jam mjeku që kam ardhur në mëngjes, kam qenë në shërbim, kam vizituar, ka qenë e hapur 7-8 cm po them dhe ka lindur normal, ka pasur një qepje të vogël dhe kaq”, u shpreh Selmanaj. Deri në datë 4 janar, Orjana ka qenë e shtruar në spital, siç tregoi mjeku ama nuk kishte dijeni për gjendjen e saj emocionale. Ai u shpreh se duke qenë se gruaja erdhi e vetme, te gjithë u angazhuan për kujdesin e saj sepse ishin të shqetësuar pikërisht prej faktit se mbase nuk do të donte të mbante fëmijën. Vetë Orjona, tha mjeku, u shpreh se nuk e donte fëmijën.