Ambasadori i SHBA-së në Kosovë, Jeffrey Hovenier ka folur për mediat pas takimit me presidenten e Kosovës Vjosa Osmani. Ai theksoi nevojën për qetësimin e situatës në veri. Hovenier gjatë ditës është takuar edhe me dy kryetarët e komunave, të Zveçanit dhe atë të Zubin Potokut, Ilir Pecin dhe Izmir Zeqirin.
Mëngjesin e sotëm, grupe qytetarësh serbë janë mbledhur para objekteve komunale në Zveçan, Zubin Potok e Leposaviç, për të kundërshtuar hyrjen e kryetarëve të rinj shqiptarë. Mes tyre, sipas raportimeve, ka pasur edhe njerëz me maska, e për të cilët Instituti Octopus ka ngritur shqetësimet se mund të jetë të gatshëm për sulme terroriste.
Policia e Kosovës dhe paqeruajtësit e KFOR-it kanë shtuar praninë, ndërkohë që serbët në Zveçan kanë hedhur gaz lotsjellës në drejtim të pjesëtarëve të institucionit të sigurisë së Kosovës.