Një studim i ri ka konstatuar se humori i keq mund të jetë produktiv në punë. Sipas kërkimeve nga Universiteti i Arizonës, aftësia e njerëzve për të procesuar gjuhën varet nga mënyra si ndihen.
Ekipi kërkimor zbuloi se bëhemi më analitikë kur jemi të zemëruar, sidomos kur bëhet fjalë për të gjetur çfarë nuk shkon në një punë dhe në këtë rast, i rendisim më shpejt gabimet.
“Emocionet dhe gjuha duket se përpunohen në zona të ndryshme të trurit. Por ne kemi një tru dhe të dyja ndodhen aty, ndaj ka shumë ndërveprim”, u shpreh profesori Vicky Lai. “Kur njerëzit nuk janë në humor të mirë, janë më të kujdesshëm dhe analizues. Ata shohin me vëmendje çfarë shkruhet në një tekst dhe nuk mbështeten tek dija e tyre”.
Pjesëmarrësve në studim iu ‘manipulua’ humori duke i vendosur të shihnin video të shkurtra nga filmi “Sophie’s Choice”ose seriali humoristik “Friends”. Pjesët e serialit nuk patën asnjë ndikim, ndërsa të filmit iu shkaktuan trishtim.
Më pas ata dëgjuan regjistrime zanore neutralisht emocionale, me 4 fjali ku në secilën ndodhej një “fjali kritike” që mbështeste ose sulmonte njohurinë e tyre me fjalët. Fjalët e kësaj fjalie shfaqeshin një nga një në ekran ndërsa valët e trurit të tyre monitoroheshin në një makineri.
Më tej, pjesëmarrësit u prezantuan me versione të historive ku këto fjali kyçe ndërroheshin që mos të kishin lidhje me kontekstin. Më pas u studiua se si ata reagonin për këto ngatërresa, bazuar në humorin dhe emocionet e tyre.
Eksperimenti u krye dy herë, njëherë në kushtet e humorit të keq dhe njëherë në ato të të mirit. Testet u kryen me diferencë një javore, por u përdorën të njëjtat histori. Përfundimi ishte se kur pjesëmarrësit nuk ishin në humor të mirë, shfaqej një lloj i aktivitetit të trurit i lidhur ngushtë me rivlerësimin.