Ka hyrë sot në fuqi udhëzimi i ministres së Arsimit Besa Shahini në lidhje me procedurat e administrimit të teksteve shkollore në përdorim falas për nxënësit e klasave I–IV të arsimit bazë.
Sipas këtij udhëzimi, nxënësit do të dorëzojnë tekstet shkollore të marra në përdorim, menjëherë me përfundimin e vitit mësimor. Akti i dorëzimit të teksteve shkollore nënshkruhet nga drejtori i shkollës dhe nga mësuesi kujdestar. Mësuesi kujdestar bashkëpunon/koordinon me prindin e nxënësit apo përfaqësuesin ligjor të tij, për kthimin e teksteve nga nxënësit, raporton tirananews.al.
Shkollat, brenda 10 ditësh nga përfundimi i procedurave, do të raportojnë në institucionet arsimore vendore, përgjegjëse për arsimin parauniversitar, numrin total të teksteve të papërdorshme për çdo titull. Institucionet arsimore vendore, përgjegjëse për arsimin parauniversitar do të raportojnë në Drejtorinë e Përgjithshme të Arsimit Parauniversitar dhe në MASR.
Në rastet kur nevoja për tekste shkollore për vitin pasues tejkalon numrin e teksteve shkollore të kthyera për t’u përdorur, shkolla do të bëjë porositë për tekstet shkollore shtesë, pasi të jetë siguruar nga institucionet arsimore vendore, përgjegjëse për arsimin parauniversitar, konfirmimi dhe auditimi i procedurës për çdo shkollë. / tirananews.al